Blackmystery.com


Home

 		  

* Indis Ferien Tagebuch *

Sunntig 27.1.2008

Mit meh oder weniger klare Chöpf hät mer sich um di nüni zum zmorge troffe. Nachher händs no Föteli agluegget vo Gordon Setter Am halbi zwölfi sinds dänn aber abgfahre nöd ohni z’säge das ich wiederemal därfi cho.Also mir händ die drü Zürihegle scho gfalle.

Und jetzt no es paar Amerkige vom Ruedi:
Euis hätt d’Indigo unwahrschindlich vill Fröid bereitet.Mir vermissed sie jetzt scho. Sogar de Flame gaht wieder de andere Hünd us em Wäg. Es isch wieder echli dünkler worde im Huus sitt de Sunneschii wieder hei isch. Mir froied euis uf s’nächscht wiederseh und uf euises nöie Hündli.
PS. De Tempoverbruch(Nastüechli) vo de Alice hät enorm zuegno!!!!!!!!!!
Indy machs guet und bis bald.
 

       

----------------------------------------------------------------------------------

 

Samstig 26.1.2008

Irgendwie isches nöd eso wie suscht. Es isch doch Samstig und de Ruedi gaht gliich is Gschäft.Alice isch mit Packe beschäftiget und mini Box im Schlafzimmer isch au weg.
Am zäni isch dänn de Ruedi mit em Camper zrugg cho und hät zu mir gseit so jetzt gönnd dini Ferie leider verbii und mir müend dich is Rhytal bringe. Ein Teil hät i mir gjublet will ich zrugg i mis Rudel und zu de Birgit und de Cécile därf,andersits jetzt wo de Flame eso lieb mit mir spielt bini scho chli truurig worde. Aber nach ärä Biselrundi simer no deGhira und de Marlene go tschüss säge und dänn ab Richtig hei. Im Rhyvorland hemer dänn no d’Rosmarie,de Hugo,d’Unna und d’Umbra troffe. Det simmer dänn no öppe föifviertel Stund go laufe. Aschlüssend isches dänn a d’Hüggliwies 4 gange. Im Garte bin ich dänn vo einere nach de Andere begrüesst worde. Für Zweibeiner hät dänn Birgit en feine Brate mit Nudle und Gmües kochet. De Ruedi hät nüme welle ufhöre mit ässe.Es zytli sind dänn d’Alice und de Ruedi is Wälpegatter inne ghocket und händ sich vo däne Schnüggel fascht frässe lah. Dänn händs dänn no, di einte uf mis Wiederseh und die andere zum Abschied, bis am eis am Morge am Eis agstosse. D’Zürcher wills truurig gsi sind und d’St.Galler wills Fröid gha hän das sie mich wieder händ. Nachher sind mer alli i d’Better kroche.

 

  

----------------------------------------------------------------------------------------- 

Friitig 25.1.2008

Hüt am Morge isch de Fäischterbauer cho Fäischter usmässe. Dem hani natürlich müesse zeige das ich de Chef da bin und hanen abället. Nachher isch d’Barbara und mir go laufe. E ganzi Stund simer underwegs gsi. Ich seg ä ganz e bravi gsi. Dänn sind d’Alice und ich uf d’Hompage vo Blackmystery gange und händ nüt nöis gfunde. Aber Birgit was dänked au mini Fans? Wo de Ruedi heicho isch isch dänn d’Alice go poschte.Eifach ohni mich. Ich bi ganz truurig gsi und nödemal de Ruedi hät mich chöne tröschte. Huuuuuuuuuuuuuuuuu. Und hüt Abig gaht er no a d’GV vom Männerchor. So hani d’Alice wieder ellei für mich . Sie isch natürlich mächtig stolz das ich sie so gärn han. Jetzt gahts nüme lang und ich bi wieder zrugg bi eui. Das freut mich scho aber es isch natürlich au lässig gsi das ich ha chönne im Mittelpunkt si.
Tschüss bis morn
 

      

--------------------------------------------------------------------------------------------

 

Donnerstag 24.1.2008

Hüt am Morgä hämer gar nöd wellä ufstah. Geschter han ich am Ruedi nöd tschüss gseit und hüt hät er d’Brötli sälber müesse mache. Hi hi han ächt ich d’Alice e so müed gmacht?
Wo mer sind go laufe am Morgä bini schön brav glofe. Am Namittag hanis dänn scho ehner mit a de Leine zieh probiert.Aber de Ruedi isch halt scho ehner en Gegner und hät meh Chraft. Zrugg i de Garage isch wieder de Türgg mit em chalt Wasser losgange. Dänn isch de Flame wieder ufdringlich worde. Ich ha eigentlich nur wellä spiele. Ueberhaupt sit geschter probiert er mich immer wieder ufzfordere zum spiele,oder meint das Bürschtli ächt öppis anders. Jedefalls tuen ich vorsichtshalber zwüscheddure abhocke. Will Alimänte zahli er dänn uf jedefall nöd hät er gseit. Typisch:Spass ha und nöd zu de Konsequenze stah. Aber er isch dänn scho hartnäckig. Jetzt tüemer aber wieder schlafe schliesslich sind mir aständigi Hünd und im Huus simer ganz schön ruhig. Also bis morn und am Samschtig gsehnd mir euis ja wieder und chönd euis dänn immene Frauegspräch mitteile.
Tschüss zäme!

        
 

-------------------------------------------------------------------------------------------

 

Mittwoch 23.1.2008

Bis am achti hämer gschlafe. Nöd emal de Ruedi hani ghört woner gange isch am morge.
Am halbi elfi simer dänn uf de Walk. Als erscht han ich de Alice en rabeschwarze Vogel azeigt. Hani guet gmacht. Dänn simer bis zum Burehof abe. Det isch dänn d’Sina use z’stürme cho.Chli und giftig hät sie mir doch ihres Gebiss presentiert. Hät ächt das Appizällerwiib gmeint ich seg Dentalhygienikeri. Bruche het sie scho eini chöne. D’Alice hät dänn gseit: „Chum mir gönd wiiter. Richtig Wald simer dänn über d’Wiese glofe wo mer mir au het Milistaubsuuger chöne säge .So bin ich im Zick Zack mit de Schnörre am Bode de Muusgäng nah. D’Alice hät mir aber kei Chance gäh zum buddle. So gemein!!!
Mit em Flame am Füdli simer dänn hei zu gloffe. Was söll das? Hani im Fall nöd so gern. Spitzigi Zunge behauptet später dänn scho!! Was meined ächt die. Guet ich fräg dänn emal Birgit oder d’Eliane vom Blick. Zrugg im Garte hät dänn de Flame no ä Rundi gspielt mit mir.Nachem Mittagässe isch dänn s’grossi schlafe für 4 Beiner agseitgsi. De Nachbar ,won ich doch eigentlich känne isch dänn no cho und ich han en ganz fescht a bället. Isch doch de Ruedi nöd da gsi und dänn hät en Maa nüt da z’sueche. Am Geri hät das aber kein Idruck gmacht. Er hät glich die Maas gholt woner brucht hätt zum es Brätt zuschniide. De Ruedi isch hüt erscht am sechsi vonere Sitzig in Züri heicho und drum hätts am Namitag
Kein grosse Spazier gäh. Schad. Jetzt tuen ich no chli schmüsele mit de Alice und scho bald *Ghöri es Glöggli das lütet so nett . de Tag isch ver...................
Tschüüüüüüüüüüüüüüüüüüüüüüüüüüüüüüüüs

       

----------------------------------------------------------------------------------------------------------------------------   
 

Dienstag 22.1.2008

Am Morge händ mir beidi Mühe gha mit ufstah. Aber d’Alice hät use müesse.
Hüt isch wieder Dsischtig und mir gönd is Aquqfit, wie jedi Wuche.Aaschlüssend isch poschte agseit gsi. Am Nammittag oh Schreck hät d’Alice dänn en Bluetfläck uf em Bode gfunde. Söll das heisse das ich mini Ferie nöd bis am Schluss cha durehebe. Wenn ich würkli läufig wird dänn isches natürlich gfährlich bimene Maa wo ja scho Routine hät.
Und quäle wämer de hübschi Kärli ja au nöd oder. Guet go laufe simer dänn z’vierte. Dasmal hämer de Kringelbach vo de andere Site agange. So händ mer d’Stäge und Brügglis weniger usgmacht. Womer zruggcho sind hätt dänn de Ruedi no a de Birgit aglüütet und gfräget wies witer gaht und uf was das mer muess ufpasse. Ich glaub bis am Sunntig chönd sich de Flame und ich schono beherrsche und dänn gsehmer wiiter. Also händs guet .Nach em z’ Nacht händs dänn nomal Bluet gfunde . Also de Countdown läuft.
Isch ja nöd so schlimm viellicht därf ich wieder e mal es Bsüechli go mache. D’Alice isch jetzt scho truurig und de Ruedi meint er vermissi dänn d’Action scho. Also bis morn.Mit einem weinenden Auge!!!!!!!!!!!!!!!!!!!!!!!!!!!!!
Es macht euis scho chli truurig sonen feine Hund e Wuche früehner herzgeh.
Sie dörf au später wiederemal cho.
 

 

-----------------------------------------------------------------------------------------------------------

Montag 21.1.2008

Hüt isch wieder früeh ufstah agseit gsi. Am zäni hät d’Alice no e Chundin gha di hani fascht de Bock grüehrt. Sie hät hald nach Hund gschmöckt und grad min Spieltrieb gweckt. Am elfi hät dänn de Ernscht vom Läbe agfange. Ich han e Probelektion im Bank
Bewache gha.Mit de Alice han ich ganz elei därfe i d’Zürcher Kantonalbank is Dorf därfe.
Ganzes grosses Sitzigszimmer hani müesse bewache wäred dem die Fraue s’Gschäft erlediget händ. Ich bi mir natürlich stinkwichtig vorcho. Aber es hät nödemal Zahltag gäh für min erschte Job. So knauserig sind d’Banke.
Ja nu nach em z’Mittag hätts nur e chlini Tour gäh will de Flame am drü hätt müesse zum Tierarztzum impfe. Mir händ en zum Ruedi is Gschäft bracht und diä sind dänn mitenand uf Wädischwyl go impfe. Mir ,d’Alice und ich , sind dänn vo det us Richtig Pfäffikersee glofe. Wills det Leinepflicht isch hani halt müesse brav si.
Ich bi dänn scho froh gsi das gäg de Abig de Flame wieder zrugg cho isch. Jetzt muess ich aber usruebe mer weiss ja nie was sie mit mir morn wieder vor händ. De Fotoapperat isch leider hüt de hei blibe, viellicht brucheds emal eine mit eigne Bei.
 

       

--------------------------------------------------------------------------------------------------------------------

Sunntig 20.1.2008

Hüt znacht hämer alli nöd so guet gschlafe. Mir wüssed aber nöd warum. Nach em z’morge hämer no chli gwartet und sind dänn am 10:15 uf d’Loitsch gange. Leider hämer de Geri und d’Ghira uf de Tödistrass troffe. Sie hätt aber nöd mit uf d’Wiese dörfe. Sie händ nämli am Namittag Bsuech übercho und de Geri hät nöd wellä das sie de frisch putzt Bode wieder dräkig macht. Mir sind dänn wiiter und uf de Wiese isch dänn de Rico cho und ab die Poscht. Dänn isches wiiter ufs Rosinli gange und will hüt Sunntig isch, isch det au de Kiosk offe gsi und mir händ no en halbe Rose gno. A de Huswand nah isches ganz schön warm gsi und Usicht i d’Alpe und di umliegendä Seeä sind fantastisch gsi. Dänn hani dänkt jetzt gahts wieder hei aber falsch. Nach 20 Minute simer witer Richtig Golfplatz.
Vo det simer dänn über de Chringelbach zrugg uf Bäretswil. Underwägs hani dänn müesse über zwei Gitterbrüggli laufe. Bim Wasserfall isches au no sonä blödi Gitterstäge abegange. Sisch mer nöd so ganz ghüür gsi. Mues ich dänn nöd all Tag ha. Wo mir dänn am viertel vor zwei vom Neutal her duruf cho sind hämer d’Ghira nomal troffe aber ich ha nüme möge umeseckle bi eifach gschafft gsi. Dehei acho bini dänn nur no gläge. Ich glaub wänn d’Ferie verbi sind bruch ich dänn Erholig.Viellicht chani dänn Werbig mache für Dulix oder Perskindol. Aber im Fall de Ruedi isch dänn bim läse im Wintergarte au igschlafe, und d’ Alice hätt jetzt grad grüeft sie chöngi jetzt au kei Luftsprüng meh mache.
 

           

----------------------------------------------------------------------------------------------------------

Samschtig de 19.1.2008

Hallo Ladys vo de Hügliwies 4
Gahts eui nonig besser? Warum ich das fräg? Ich weiss doch vo minere Pflägfamilie das ihr chrank sind und sit em Dischtig isch nüt meh vo mine Bricht online! Ja hüt isch en stränge Tag gsi. Zerscht nach em Ufstah am 8:30 hämer z’mörgelet. Dänn hämer di nöi Stereoalag verkablet. Ich seg eui es isch en huere Stress gsi für de Ruedi und mich. Aschlüssend hämer s’Skiränne glueget. Am eis simer dänn go laufe. Klar d’Ghira und d’ Marlene sind au mitcho. Hey ich säg eui bis zur erschöpfig simer gsecklet. Sogar de Flame isch ab wie Poscht. Er isch scho en lässige Gai. Wenn de chli grösser wär, ich weiss dänn nöd!!!!! Womer zrugg cho sind bini total groggy gsi. Langsam fräg ich mich schafft mich de Ruedi oder ich Ihn? Ich glaub de Cheib isch zimli clever! Holt er doch amig d’Girah und mit däre isch es halt scho lässig umez’speede. Zrugg de hei hani dänn no gulfe de PC z’verkable. Jetzt wott i aber mini Ruhe. Uebrigens Fotos gits hüt kei. Warum? D’Alice hätts zwar uf em Spazier immer wieder probiert aber de Ruedi de Depp hät geschter vergässe d’Speichercharte zrugg in Photiapparat z’tue.

Hey Girls bis morn

------------------------------------------------------------------------------------------------------------
 

Freitag 18.1.2008

Hüt isch en Troubelshoutertag. Alles isch am morge glofe wie immer. Dänn isch de Ruedi am 10:30 heicho will de Hagbauer cho isch. Dä hät au schöne Mischt baue. De Hag isch nun würklich keis Problem fürs nöie Hündli wo hoffentlich bald da izieh därf. Nacher simmer no in Wald gange.Dänn hani nochli fernsehglueged. Das heisst ich ha im Wintergarte use i d’Ferni glueged. Am halbi drü hemer de Ruedi im Gschäft abgholt und sind in Carrefour go poschte. Hüt hani emal echli chöne usruehbä. Aber so wie ich die zwei känne isch defür morn meh Action agseit. Uf jedefall tuet mir Erholig gar nöd schlächt.Defür hani hüt glehrt wie d’Glastür i de Chuchi chasch ufmache. Bin ich nöd e Gschiiiiiiiiidi hä!!!! Wüsseder die choched würkli immer guet. Lueged nur de Ruedi a. Und bi eui isch alles im grüene Bereich?

Schlafed guet.und werded schnäll wieder gsund

        
 

-----------------------------------------------------------------------------------------------------------

Donnerstag 17.1.2008

Hüt am morge hani echli müesse wurge han aber no use möge und scho isch es mir wieder guet gange. Mir sind dänn am morge wieder Richtig Kringelbach gloffe. Will det en Maa Reh gseh hät hani müesse a d’Usziehleine. Am drü chum isch de Ruedi durs Gartetörli cho han ich agfange singe schliessli isch hüt in Bäretswil Männerchorprob. De Ruedi hät mir aber dänn erklärt das di einzig Frau wo det därf mitmache Dirigäntin isch. Also chan ich nöd gah. So beschränk ich mich uf mini Solis. Underwägs i d’Pulte hämer no d’Ghira und d’Marlene mitgno. So bini wieder zum umespeede cho. De Ruedi het i fascht de Bock grüert und er frägt sich jetzt öb ich nöd no e paar Wildsaugene hegi. Mir händ nachdem sich di andere zwei usklinkt händ no euisi gross Fiirabigsrundi gmacht. und ich han au no chöne innen Bach go bädele. De Ruedi hät dänn es Reh gseh und schwupps simmer wieder a de Leine glofe.Ob ächt de Ruedi nöd gärn Rehrugge hät? Jetzt isch halbi sächsi und ich chan wieder usruebä.

Tschüss bis morn

      

   
  -----------------------------------------------------------------------------------------------

 

Mittwoch 16.1.2008

Hüt am Morge han ich därfe mit em Flame und de Alice in Wald ue. E halb Stund simer underwägs gsi. Das ich nöd bin go muuse hät mich d’Alice a d’Usziehleine gno.
Am Namittag simer nach em Entsorge uf Bauma gfahre und a de Töss entlang glofe. De Tüüfel hät mich gritte und ich bin i Töss ie und han 2 Aente verfolgt . D’Alice und de Ruedi händ grüeft wie verruckt aber ich ha nöd de gliiche tah. Im Gegeteil ich bi dänn am andere Ufer use und richtig Strass gsecklet. Dene zwei isch aber ghörig s’Herz i d’Hose grutsch so das ich verbarme gha ha und trotzdem zrugg cho bin. Zur Straf hani müesse a d’Leine. Doch wer meh gstraft gsi isch d?Alice und de Ruedi oder ich das ist die Frage aller Fragen. Sie sind emal froh gsi das ich a de Leine gsi bin wo ich nomal es Aentepäärli gseh han.
Churz vor mer is Auto zrugg sind händ dänn de Flame und ich no Buch und Pfote müesse i de Töss bade.
Soviel zum hütige Leinetag
Macheds Guet
 

       

--------------------------------------------------------------------------------------------------

 

Dienstag 15.1.2002

Hallo Fans

Geschter Abig memer no all zäme Sister Act 2 glueged. Es isch uh lässig gsi hami vor lache so richti verdreht i de Wanne inne. Ha mi so wohl gfühlt.
Nachere guete Nacht bin ich guet glunt ufgstande . Hüt isch wieder Aquavit agseit. Mir zwei Vierbeiner händ ganz brav im Auto i de Boxe gwartet bis d’Alice wieder frisch badet us em Hallebad Bauma use cho isch. Und will mir so brav gsi sind hämer en feine Chnabberstängel übercho. Dänn hätt sie no poschtet und nacher simmer no echli in Hoger ufe.
Am drü isch dänn de Ruedi hei cho Zitig läse und aschlüssend hätts en anderthalbstündige Waldlauf gäh. Powerlady händs mer gseit . Ich ha chöne riisigi Rundene durs Dickicht seckle.
So geil. Ich bi immer schön brav retour cho han also beschti Werbig gmacht für d’Gordonsetter. En Schreck isch dänn däne zwei no i d’Chnoche gfahre wo plötzlich es Ross
Dehär cho isch und ich no am streune gsi bin. Aber brav wien ich bin bini langsam zum Wald us cho und ha de Habermotor nöd emal abolle. Bravi Indigo. Wenn ich jetzt bim Frässe no chli vorwärts gmacht het ,het mer chöne meine ich seg us em Chloster vo Sister Act.
Keis Wässerli han i trüebt. Eso hani sicher nur schöni Träum hüt Nacht.

Also träumet guet!!!!!!!!!!

           
 

Mäntig 14.1.2008

Tod müed bini geschter i d’Box go schlafe und am Morge hät i au no gärn echli wiiter dösed doch de dumm Wecker hät scho wieder am föifi am morge glütet.
Aha es isch wieder Mäntig und de Ruedi muess in Stolle. Bis am halbi achti sind dänn mir wieder undere. Mit em Frässe han ichs im Momänt au nöd so. Viellicht b fählt de Fuetterniid. Es frisst mirs eh niemer weg und ich chönnt ja susch öppis verpasse.



Mir sind dänn wieder Richtig Erholigsheim go tschalppa (ein Bündnerausdruck)
Und da ich nonig gmerkt han das d’Alice überhaupt kei Fröid hät wenn ich muuse isch sie mi halt wieder nahgsecklet und hät mich churzentschlosse a d’Leine gno. Zur Straf hani am Namitag nur no a de Usziehleine därfe go spaziere. De Ruedi isch hüt später heicho will er no hät müesse Kommissione go erledige. Und bim Frässe z’ Abig hät er nöd vill geduld gha mit mir und hät mir nachdem ich immer vom Napf weggloffe bin s’Frässe eifach weggno.
Isch das nöd de Gipfel. Aber er hät halt sälber au welle go ässe. Bim Nachtässe
Händ dänn Zweibeiner gmerkt das ich uf de Felge bin.
Also lönd mi jetzt in Rueh ich will döse

Tschüss bis morn
 

---------------------------------------------------------------------------------------------------------------
                                                                                                                                                        

 

Sunntig13.1.2008

Hüt hämer wieder bis am halbi nüni gschlafe. Am elfi isch dänn walking agseit gsi.d’Marlene, d’Ghira,d’Alice,de Ruedi, de Flame und ich sind loszoge. Ueber d’Wiese zum Rosinli. D’Ghira isch guet druf gsi und hät mi gjagt wie verruckt. Bim Siegetaler emene Buur isch dänn no de Rico dezue cho und mir sind ab wie d’Sau. Zwüsched dure hani dänn de Alice no zeiget wiemer im Accord es Musloch usbuddlet. D’Frag isch wer zahlt ächt de Agrarschade? Nach anderthalb Stund simmer dänn retour cho und Zweibeiner händ gmeint mir möged immer no. Aber mir sind doch kei Maschiene. Sie händs dänn schnell ufgäh und ich und de Flame händ dänn därfe mit em Ruedi d’ Lauberhornabfahrt luege. Ich ha scho gmerkt nöd nur mir sind gschafft gsi. De Ruedi isch au ständig igschlafe.
Aber was für en freudige Tag am Abig sind denn no Birgit und d’Cecil cho luege öbs mir guet gaht. Bi dänn scho en Momänt truurig gsi wos eifach wieder gange sind. Aber mir gfallts da ebä au guet. Jetzt bini aber müed.
Also alli mini Liebe pfuused guet.

Euii Indi

           
 

--------------------------------------------------------------------------------------------------------------------------------------------------

Samstag 12.1.2008

Läck hüt händ mir all zäme bis am halbi nüni gschlafe. Nach em z’morge simer go poschte. Das heisst d’Alice isch in Coop und de Ruedi,de Flame und ich sind go laufe. Skilifttour heisst de Walk will er gaht bim Skilift dure. Ja ja das Kaff hätt sogar en eigne Skilift.
De fallendi Schnee hät euis ganz schön nass gmacht. Und mini Hirnwindige, vor allem die wos folge beinhaltet, sind glaub iigfrohre. Uf jedefall hät de Ruedi alles versuecht das ich nöd ganz Bäretswil umgrabe han.



Nach em z’Mittag hemer dänn de Marlene aglütet das mini Fründin nochli veruse chunnt und mit mir secklet. Super aber bald hani wieder Müüs gsuecht und überhaupt nüt me gloset. Bis de Ruedi mich denn verwütscht het und mich uf de Rugge gleit hät. Aber ätsch hät mer nöd so vill Idruck gmacht. Ich ha dänn glich für d’Ghira und mich Brot us de Rehchrippe klaut. Drum hani dänn halt a d’Leine müesse und de Ruedi hät mer dänn zeiget was er under Fuss laufe verstaht. Aschlüssend simer dänn nomal uf de Wiese umetobet bis mer todmüed hei sind.
So das wär de Samschtig gsi. Ich froie mich uf morn will dänn isch Tag der offenen Tüer für Heiwehchranki Gordonbsitzerinne und ich bechum Bsuech us em Rhiital.
Tschüss bis morn.
 

            

---------------------------------------------------------------------------------------------------------------------------------------------------------------------

Freitag 11.1.2008

Guet hani wieder gschlafe. Hüt hani därfe d’Barbara känne lerne.Das isch d’Nachberi wo hindere m Huus vo de Alice wohnt. Sie isch mit euis cho spaziere am morge. Da ich wieder em Buur han welle hälfe muse hät mi d’Alice churzentschlosse a d’Leine gno. Erscht im Wald hani dänn wieder chöne umespeede. Ich hami im Fall vo de beschte Siite zeiget. Au d’Barbara hät gseit ich seg e ganz e schöni. Jetzt stiigts mer dänn bald in Chopf. Aber echli es Tussi bini halt scho. Chum simer dehei gsi hät doch d’Alice das blöde Rüsselding führe gno wo so dummi Grüsch vo sich git wenns lauft. Alle Dräck frisst das Ding. Ah ja Staubsuuger heisst das doofe Ding vordem ich mich ha verstecke müesse, Aber ich bi nöd elei .Gäll Flame dir passt das Ding au nöd.
Da d’Alice gäg de Abig no en Chundin erwartet hät isch de Ruedi mit euis Dogis elei go spaziere.Vorher hät er mir aber no vorgsunge und da hani nöd gwüsst singt er falsch oder chum ich nöd so drus? Vorsichtshalber han ich en emal echli schief aglueget. Ich ha dänkt hüüt folgsch lieber bevor er luut wird. Eso isch en lange aber ereignisslose Walk gsi. Aber de Ruedi hät u de Plausch gha das ich mich vo de Schoggisiite zeigt ha. Aber nach wiitere anderthalb Stund bin ich au gschafft gsii. Möged Ihr eui erinnere am Aafang hemer doch vom Ruedi sim Buuch gredet ? Er hät im Fall scho 2Kg abgspäckt. Ich bi so stolz uf mich.

Also macheds guet ich probiere de Ruedi übers Wuchenänd nochli zfordere.

Wuff wuff tschüssli see you

            

     
 

-------------------------------------------------------------------------------------------------------------------------------------------------------

Donnerstag 10.1.2008

Zerscht no zu geschter Abig. De Ruedi hät im Wintergarte no de Schwedeofe igheizt und grausam müesse ufpasse das ich mini Schnauze ,wo ich als neugierigs Wyb immer zforderscht han, nöd verbränne. Wo’s dänn so schön warm worde isch und de Ruedi sichs gmütlich gmacht hät han ich ihm natürlich no welle zeige wie gern ich ihn han. Schliesslich händ doch uf somene Stuhl au zwei Platz,oder nöd? Es isch richtig en kuschelige Musigabig worde.
Am morge isch dänn Ghira und d’Marlene wieder cho und Poscht isch abgange. Ich ha dänn eifach kei Luscht gha bim heigah z’folge und ha nur Seich im Grind gha. Zerscht hani wieder gmuset das mich d’Alice hät müesse hole. Und wo sie mi wieder losglah hät
Bini no go en Chueflade frässe. Sisch ja klar dänn bini wieder abgspühlt worde,debi hani so guet gschmöckt.
Chum isch dänn de Ruedi de hei gsi hani mi scho so guet erholt gha das i wiiter Scheiss baue han. S’Mireli (s’Büsi) hät userhalb vom Garte so herzerweichend gmöööget das ich mit emene Satz übers Törli ha müesse go luege. Was söll denn das Gschrei ich bi ja freiwillig zruggcho. Aber erscht wo d’Alice s’Törli uftah hätt. Schliesslich wartet en aständige Hund bis s’Gartetörli offe isch und gumped nöd zrugg in Garte. Die zweh Mänsche händ dänn s’Gfühl gha ich seg wieder fit und ab ischs gange inWald. Ich ha mi dänn zerscht vo de beschte Siite zeiget bis uf em Heiweg da hätt mi dänn wieder de Tüüfel gritte. Aber mer stellt im Wald au nöd e Chrippe für d’Reh uf und tuet det no Brot dri,wenn mer genau weiss das en arme fascht verhungerete Hund det gaht go spaziere. D’Alice hät gar kei Verständnis gha und hät mi gholt, will dur rüefe isch nüd z’mache gsi. Aber nüt für Unguet ich wickle die zwei scho wieder um de Finger. Eigentlich sinds nur bim abdusche unerbittlich. Und brrrrrrrrrrrr immer mit chalt Wasser. Also bis morn ich dänk mer jetzt no chli nöie Schabernack us.

Tschüss bis bald
 

       

       

------------------------------------------------------------------------------------------------------------------------------------------

Mittwoch 9.1.2008

Hüt am morge bini mit em Flame und de Alice go e Rundi laufe. Uf de Wiese hani dänn ufzmal ä Bewusstseinstörig gha. D’Alice hät mir chönne rüefe wie sie hät welle. Als Büsi
han ich mich über es Muusloch hergmacht und so am Buur ghulfe umzstäche obwohl er die Wiese im Summer nur als Weid nützt und nöd als Acker. Aber wie söll ich das wüsse? Bi doch au nur es Büsi äh en Hund. D’Alice isch dänn halt zrugg cho und hätt mi gholt. Dänn hätts nachdem ich nomal nöd cho bin d d’Leine müesse. Das passt mer schon öd eso aber ich glaub ich bi sälber schuld. Dänn hät sie mir au no d’Schnörre abgspritzt also bitte das mag i dänn öppe gar nöd. Aber ich ha kei Chance gha. Bis dänn de Ruedi heicho isch han ich dänn echli relaxt.
Woner dänn heicho isch han ich en mit mim schönschte Gsang begrüesst. Wüsseder de Ruedi gaht ja am Dunnschtigabig in Männerchor go singe unnd wenn ich im jetzt zeige das ich au singe chan ,dänn nimmt er mich viellicht mit. Wenn nöd üeb ich halt mit im dehei.
Mir händ dänn en schöne Usflug gmacht rund ums Rosindli. Ich bi dänn au ganz lieb gsi und immer i de Nächi vo de andere drü blibe. Nach em z’Nacht chan ich dänn wieder schön usruebe und wenn mir is Bett gönd gang ich schön freiwillig i mini Box sehr zum stune vo dene zwei Zweibeiner .
Uha bin scho ganz schön gschafft.
Guet Nacht Girls in Rebstei

        

      
 

-----------------------------------------------------------------------------------------------------------------------------------------------------------------------

Dienstag 8.1.2008

Scho wieder am Morgä am foifi hät de Wecker tschätteret. Ganz churz bini ufgstande zum am Ruedi en guete Tag zwünsche. Dänn bin i aber sofort wieder mit de Alice go wiiterschlafe. Aber am halbi siebni isch dänn Tagwach gsi. Schnäll frässe use in Garte und dänn isches stinke langwilig worde. Mir sind uf Bauma. De Flame und ich händ det im Auto müesse warte bis d’ Alice frisch badet us em Aquafit zrugg cho isch. Dänn simerno go p0schte und will ich eso herzerbärmlich gjämmerlet han, hämmer dänn no en drüllete Chaustängel übercho. Hani guet gmacht gäll Flame. Zrugg in Bäretswil hätts dänn no e n stündige Spaziergang gäh wo de Flame und ich no echli gspillt händ.
Am halbi zwei simmer dänn zu de Hundecoiffeus gange und d’Alice hät sich det en Instruktion gäh lah wiemer de Flame am effiziäntischte cha strähle. Will ich wieder gjämmerlet han ,hani au därfe go zueluege. Dänn hani probiert abeneme Gstell Schwiinsöhrli chlaue aber die zwe Fraue händs gmerkt. Ja Päch gha. Am drü isch dänn de Ruedi heicho und ab simmer wieder i Pulte ue. Will dasmal kei chlini Chind debi gsi sind hät sich d’Runde öpe verdrüfacht. So lässig, ich han chöne durs Unterholz speede. Viellicht hett ich echli besser sölle uf de Ruedi lose dänn hett er nöd ufzmal mit ganz tüfer Stimm muesse I N D I G O rüefe. Ich glaub nerve chan ich en wenn ich fremdi Lüüt gang go abälle anstatt zu im zrugg z,gah wenn er rüeft.Nach anderthalb Stund simmer dänn wieder hei. Jetzt wett i aber scho säge zum absprütze hett ich dänn lieber warms Wasser. Aber i de Garage vermögets das glaub nöd. So bald gits z’Nacht und dänn gang i dänn glaub bald echli go ruebe.

Tschüss bis morn Indi

         
 

-----------------------------------------------------------------------------------------------------------------------

Montag 7.1.2008

Läck han ich guet gschlafe. Ich wird es richtigs Camping-Girl. Han ich doch e Box übercho us Stoff. Hüt am Morgä hani wieder därfe mit de Gihra( weisser Schäfer 1 ½ J) umetobe so wie geschter am Namittag. De Flame hät hüt nonig so möge .Er hät glaub no Muskelkater vo geschter.

Nach soviel Action bin i dänn aber au müed worde.

    

so hani mich dänn i d’Wanne zrugzoge. Am Namittag sind dänn d’Aenkel vo de Alice cho und wo de Ruedi au vom schaffe heicho isch simer no i d’Höchi gfahre und händ no en Waldlauf gmacht.
Aschlüssend hät dänn de Flame und ich z’Frässe übercho. Also ich dänke die drü us Bäretswil händ scho de Plausch a mir. D’Alice het natürli uuu de Plausch wänn ich de Ruedi so fescht würd fordere das er es paar Kilo abspecke tuet. Ich glaub mir Fraue müend zämehebe und ich hilf ihre schliessli gits sie mir au s’Fueter.
Also bis morn ich hoff es git dänn wieder en lässigeTag.

Liebi Grüessli euii
Indigo